Heb 3 | NdeIBE | STEP | Ngakho-ke bafowethu abangcwele, abahlanganyela ekubizweni ezulwini, bekani imicabango yenu kuJesu, umphostoli lomphristi omkhulu esimvumayo.

Hebrews 3

UJesu ungaphezu kukaMosi

1 Ngakho-ke bafowethu abangcwele, abahlanganyela ekubizweni ezulwini, bekani imicabango yenu kuJesu, umphostoli lomphristi omkhulu esimvumayo. 2 Wathembeka kulowo owambekayo, njengoMosi owayethembekile kuyo yonke indlu kaNkulunkulu. 3 UJesu ufunyenwe efanele udumo olukhulu kuloMosi, njengomakhi wendlu elodumo olukhulu kulendlu yona ngokwayo. 4 Ngoba yileyo laleyo indlu yakhiwa ngumuntu othize, kodwa uNkulunkulu ungumakhi wezinto zonke. 5 UMosi wayethembekile njengenceku kuyo yonke indlu kaNkulunkulu, efakaza lokho okwakuzatshiwo ezinsukwini ezizayo.

6 Kodwa uKhristu uthembekile njengendodana endlini kaNkulunkulu. Njalo thina siyindlu yakhe uma sibambelela kuso isibindi sethu lethemba lokhu esizincoma ngakho.

Isixwayiso ngokungakholwa

7 Ngakho, njengoba uMoya oNgcwele esithi: “Lamhla, uma lisizwa ilizwi lakhe,

8 lingazenzi zibe lukhuni izinhliziyo zenu, njengelakwenzayo ekuhlamukeni, ngesikhathi sokulingwa enkangala,

9 lapho okhokho benu abangihlola khona bangilinga, babona engakwenzayo okweminyaka engamatshumi amane.

10 Yikho nje ngasithukuthelela isizukulwana leso, njalo ngathi, ‘Izinhliziyo zabo zihlezi ziduka, njalo kabazazanga izindlela zami.’

11 Ngakho ukuthukuthela kwami ngakumemezela ngesifungo ngathi, ‘Kabayikungena ekuphumuleni kwami.’ ”

12 Bonani, bazalwane, ukuthi kakho omunye wenu olenhliziyo yokona lokungakholwa, ephambukayo kuNkulunkulu ophilayo.

13 Kodwa khuthazanani izinsuku zonke kusabizwa ngokuthi lamhla, ukuze angabikhona owenu oba lukhuni ngenxa yokukhohliswa yisono. 14 Ngoba sesingabahlanganyelayo ku-Khristu uma sibambelele ngokuqina kuze kuphele ithemba esasilalo kuqala.

15 Njengoba kutshiwo: “Lamhla, uma lisizwa ilizwi lakhe, lingazenzi zibe lukhuni izinhliziyo zenu njengelakwenzayo ekuhlamukeni.”

16 Babengobani labo abezwayo basebehlamuka na? Akusibo yini bonke labo uMosi abakhupha eGibhithe na? 17 Njalo ngobani ayebathukuthelele okweminyaka engamatshumi amane na? Akusibo yini labo abonayo, abazidumbu zabo zawela enkangala na?

18 Ngobani uNkulunkulu abafungela ukuthi kabayikungena ekuphumuleni kwakhe uma kungayisibo labo abangalalelanga na? 19 Ngakho siyabona ukuthi babengeke bangene ngenxa yokungakholwa kwabo.